RSS

Daily Archives: એપ્રિલ 7, 2012

યુવાચેતના, લોકપ્રિયતા, સાહિત્ય…

મોરારિબાપુને ત્યાં તલગાજરડામાં પ્રતિવર્ષ યોજાતું અસ્મિતાપર્વ પૂરું થાય એટલે મેળો “ઉઘલતો ” હોય એવી લાગણી થાય..એક બાજુ મન ભરીને માણ્યાની તૃપ્તિનો ઓડકાર અને બીજી બાજુ ઝટપટ એ પુરા થયાનો રોમાંચક વિષાદ !

આ વખતે તો હનુમાનજયંતીએ પ્યારા બાપુએ અચાનાક જ મારા પર વ્હાલ વરસાવી હેતના હીંચકે સેલ્લારા મરાવ્યા ! વહીદા રહેમાન અને આશા પારેખના સન્માનમાં સામેલ થવાનું સૌભાગ્ય અને બાપુએ પ્રેમનીતરતી આંખે અને મોજનીતરતા કંઠે જાહેરમાં મારી સાથે માંડેલો ‘રસ’નો હોંકારો !! 🙂

પપ્પા, જીગરી યાર ઈલિયાસ, સુભાષભાઈ-નેહલ  અને હકીમભાઇ સાથે માણેલા અસ્મિતાપર્વ વિષે થોડી વધુ વાત આગામી દિવસોમાં…પણ અત્યારે તો મેં એમાં “લોકપ્રિયતા અને સાહિત્ય”ની બેઠકમાં ‘યુવાચેતના અને સાહિત્ય’ વિષય પર આપેલું ને ખૂબ જ વખણાયેલું વ્યાખ્યાન…જેમાં વિષય મુજબ સાહિત્યને કેન્દ્રમાં રાખી મેં લોકપ્રિયતા અને યુવતની વાત જરૂર જેટલી જ અંગત કેફિયત સાથે કરી છે.

આ વિડીયો માટે નેહલ મહેતાનો ખૂબ આભાર.

મને સામેથી મળેલી ‘ગ્રેસ’ની પાંચ મિનિટ અને સંચાલન ઈત્યાદિની મિનિટો બાદ કરો તો વ્યાખ્યાન મેં સમયસર જ પૂરું કર્યું હતું. કાગળ લઈને બોલવું મને ફાવતું જ નથી.

હા, સમયમર્યાદાને લીધે બે-ચાર મહત્વના મુદ્દા છેડવા – ચર્ચવાના રહી ગયા…એની જાણ ભાવકોને ના હોય પણ મને એ બધી વાહવાહી વચ્ચે જરાક ખૂંચે..પણ એ તો એમ જ હોય..બધું કઈ પરફેક્ટ ના થાય, જે થાય એ બેસ્ટ થાય તો યે ઘણું !

હવે તો ઉડતી મુલાકાતે અમદાવાદ, નવસારી, મુંબઈ વ્યાખ્યાનો માટે…કાર/ ટ્રેન / પ્લેનમાં ! નવસારીમાં આજે શનિવારે રાત્રે ૮ / ૮.૩૦ વરાછા બેન્કનું પ્રવચન જાહેર પ્રવચન છે.

ત્યાં સુધી માણો આ પ્રવચન – જે આમ તો રસિયાઓએ ઓલરેડી માણેલું જ છે 😛

હા, એના ૭૦% અંશો (આખું નહિ ) અહીં વાંચી શકાશે..થેન્ક્સ મૃગેશભાઈ.

અને વિડીયો જોવાનો કંટાળો આવે , છતાં આખું ઓરિજીનલ સ્વરૂપે ઝીલવું હોય તો અહીં ફક્ત સાંભળી શકાશે. થેન્ક્સ રણમલ.

તો આવતા જતાં જરા નજર તો નાખતા જજો..બીજું તો કંઈ નહિ…’કેમ છો’ કહેતા જજો ! 🙂

ફરીવાર અનરાધાર પ્રેમ વરસાવનાર સહુનો દિલથી આભાર, ભૂલચૂક માટે ક્ષમા અને પૂજ્ય બાપુને વંદન.

 
 
 
%d bloggers like this: