RDX બલમા ;)

બહુ ઓછી એવી ફિલ્મો હમણાં આવે છે, જે રિલીઝ થયાના મહિનાઓ પછી પણ એનું સંગીત જુનું ના થાય ને રોજેરોજ સાંભળવું ગમે ( જેમ કે, રોકસ્ટાર, દબંગ )….અને આખેઆખા આલ્બમમાં તમામ સોન્ગ્સ ( એ ય વળી બોલીવૂડ સ્ટાન્ડર્ડ મુજબ એકદમ લઘુતમ “પ્રેરણા” સાથે !) ટકાટક આપવામાં આપના ગુજરાતી હિમેશ રેશમિયાનો જોટો ના જડે.

હિમેશની ગાયકી અંગે કુદી કિડને ટીકા કરનારાઓ એનાથી બૂરા બેસૂરા કેટલાય ભેંસાસુરોને સહન કરી લે છે. પણ હિમેશની ટીકા કરવાની ફેશનમાં એનું કમ્પોઝર તરીકેનું ટાવરિંગ પરફોર્મન્સ ઢંકાઈ જાય છે. બાકી અત્યારે બોલીવૂડમાં ટોચના ત્રણ ગુજરાતીઓમાં પરેશ રાવલ, સંજય ભણસાલી સાથે હિમેશ રેશમિયા આવે – પણ આપણે ગુજરાતીઓ ય એની જોઈએ તેટલી નોંધ નથી લેતા.

બેક ટુ ટ્રેક, અમુક ટાઈમે રોન્ચીક્રેઝીસ્પાઈસી આઇટેમ સોંગ સાંભળવાની ય મજા હોય છે અને આ પરંપરા તો માધુરીના એક દો તીન ચાર અને શ્રીદેવીના કાટે નહિ કટતેથી અપુન કી લાઈફમાં મોજુદ છે. ચટાકેદાર ખાવાની ય એક લિજ્જત હોય છે. એવા ગીતો આપણા મગજમાં જાણે હૂક ભરાવીને જડબેસલાક ચોંટી જાય છે. પછી દિમાગી લોન્જમાં બે કાન વચ્ચે લૂપ બનાવી પ્લે થયા કરે છે , ઓટોમેટિક. કોઈ ડિવાઈસ વિના !

ખિલાડી ૭૮૬નાં તમામ ગીતો એવા છે , ને લોંગ ડ્રાઈવ વાળું સોંગ તો ખરેખર ૧૪૦ની સ્પીડે ભાગતી કારમાં સબવૂફર સંગાથે સાંભળો એટલે દિલમાં ઢીનચક ઢીનચક થવા લાગે ! પણ શિરમોર છે બધામાં મારી કોલર ટયુન તરીકે ય બહુ લાંબુ ટકેલું ——————-“બલમા”…..આઆઆઆહ 😉

બિગ બોસમાં ય બિગ બોસમ અને ટ્રાન્સપેરન્ટ ટોક થકી છવાઈ ગયેલી જર્મન ગર્લ ક્લોડીયાએ પણ એક વેસ્ટર્ન વામા જ કરી શકે એવો દિલડોલ અને ‘ડીલ’ડોલ ડાન્સ કર્યો છે. બાકી આ પેપીકેચી સોંગ પર….ને શ્રેયા સાથે ઇન્ડિયન આઇડોલ ૫વાળા શ્રીરામે પણ જે ફીલિંગ એમાં fill કરી છે બાકી…..તેરા રસ્તા દેખ રહ હૂં..સિગડી પર દિલ સેક રહ હૂં….બાકી અરમાન શું કાન અંગારા પર જલી જાય એવી મિરચીમરીઆદૂં નાખેલી તીખીતમતમતી  ફ્લેવર છે આ સોંગના શબ્દો જે લહેકાથી ગવાયા છે એમાં !

આર.ડી.બર્મનનાં રિમિક્સનો એક આખો યુગ આવ્યો હતો ( અને હજુ ય ગયો તો નથી જ ) જેમાં આર.ડી.ની ધમાલ કમાલ આખી એક જનરેશનને ગીફ્ટ મળી નવેસરથી. પણ હિમેશે આ ગીતમાં ( પંચમના ફોટા સહિત સત્તાવાર રીતે ) જે ધૂન બનાવી છે , એ ખરા અર્થમાં ક્રિએટીવ ટ્રીબ્યુટ ગણાય. સર્જકની રચનાની નકલ વિના એની શૈલીમાં સર્જન કરો , એ સાચી સલામી. અને અહી એ અઘરો પણ આકર્ષક પડકાર હિમેશે હસતા હસતા , નહિ- ગાતા ગાતા ઝીલ્યો છે. આ ગીત સાંભળો પછી આર.ડી.નાં આ ત્રણ ગીત ખાસ સાંભળજો : મેહબૂબા ઓ મેહબૂબા, દિલ લેના ખેલ હૈ દિલદાર કા, તુમ ક્યા જાનો મહોબ્બત ક્યા હૈ  (યોગનુયોગે ત્રણે ય રાહુલદાદાએ ગયા છે ! ) – આ ત્રણેયને ભેળવીને એમાં શરાબી આથો લઇ આવી, પછી ગુલાબી અત્તર છાંટીને જે વરાળીયો ઘૂંટો બને એ બલમા….

આરડીએક્સનાં વિસ્ફોટ જેવું સોંગ છે આ..દિવસમાં દસ દસ વાર સાંભળીને ય ધરવ ના થાય એવું ! ( એ લ્હાવાનો સુવાંગ ઈજારો કંઇ દર્દીલા જુના ગીતોનો જ થોડો છે ? અને ટીખળ સાથેની એક ટીસ વિરહની તો અહીં પણ છે ! 😛 )

આખું તો સાંભળ્યું હશે. એટલે આ ઝલક માણો….પહેલા રસિક એવા નવા બલમાની અને પછી એમાં ખૂશ્બુની નોટ્સની જેમ એમાં મિક્સ થયેલા આર.ડી.ની !

રીડર બલમા, આને કહેવાય ઠંડી મેં ભી ગરમી કા અહેસાસ…મ્યુઝીકલી ! 😉 :-“